Khamiis 19 March 2026 {CBB}Wasaaradda Gaadiidka iyo Duulista Hawada ee Dowlad Goboleedka Koonfur Galbeed Soomaaliya ayaa ku dhawaaqday in si degdeg ah loo hakiyey dhammaan duulimaadyadii ganacsi iyo kuwa gaarka loo leeyahay ee ka bixi jiray kana imaan jiray dhammaan garoomada diyaaradaha iyo meelaha ay ka degto diyaaradaha ee deegaannada Koonfur Galbeed.
Go’aankan oo dhaqan galay 18-ka Maarso 2026 ayaa lagu sheegay in uu socon doono ilaa amar dambe, iyadoo ujeeddadiisu tahay sugidda ammaanka shacabka iyo habsami u socodka hawlaha duulista xilligan jira.
Wasaaraddu waxay caddeysay in laga reebay oo kaliya duulimaadyada ay fuliyaan hay’adaha Qaramada Midoobay (UN) iyo howlgalka AUSSOM, kuwaas oo si gaar ah loogu oggolaaday arrimaha bani’aadannimo, caafimaad iyo howlaha rasmiga ah. Duulimaadyadan ayaa loo oggol yahay inay qaadaan shaqaale iyo sahay, balse lama oggola in ay qaadaan shakhsiyaad siyaasadeed iyada oo aan oggolaansho hore laga helin hay’adaha ay khusayso.
Sidoo kale, waxaa la faray dhammaan shirkadaha diyaaradaha iyo hawl-wadeennada duulista inay joojiyaan adeegyada jadwalaysan iyo kuwa aan jadwalaysnayn, isla markaana ay la xiriiraan hay’adaha ay khusayso si dib loogu habeeyo safarrada rakaabka iyo xamuulka.
Wasaaradda ayaa uga digtay cid kasta oo ku xadgudubta amarkan in laga qaadi doono tallaabo sharci ah oo adag.
