Khamiis 26, Sept 2024 {CBB}Madaxweynaha Soomaaliya, Xasan Shiikh Maxamuud, ayaa magacaabay lataliyayaal cusub oo ka shaqeyn doona hannaanka federaalka iyo dimuqraadiyadda dalka.
Cabdisamad Maxamed Gallan, oo hore u ahaan jiray Wasiirka Amniga Puntland, ayaa loo magacaabay lataliyaha dhinaca Federaalka. Gallan ayaa lagu wadaa inuu kaalin muhiim ah ka ciyaaro xoojinta nidaamka federaalka iyo isku xirka maamullada kala duwan ee dalka.
Sidoo kale, Axmed Jaamac Maxamed ayaa loo magacaabay lataliyaha dhinaca Dimuqraadiyadda iyo Dowlad Wanaagga, isaga oo si gaar ah uga shaqeyn doona horumarinta hannaanka dimuqraadiga ah iyo xoojinta maamulka hufan.
Magacaabista labadan lataliye ayaa ku soo aadeysa xilli Madaxweyne Xasan Shiikh dhowr jeer ku celiyay in dalka ay ka dhici doonto doorasho qof iyo cod ah, isla markaasna ay ka qabsoomi doonto dhammaam maamulada dalka.
