Khamis May 27, 2026 {CBB}Dowladda Soomaaliya ayaa sheegtay inay doonayso inay xoojiso iskaashiga kala dhexeeya Turkiga si loo horumariyo kaydka macdanta yuraaniyamka iyo khayraadka kale ee dabiiciga ah ee dalka ku jira, sida lagu sheegay warbixin ay daabacday Business Insider Africa.
Wasiirka Batroolka iyo Khayraadka Macdanta Soomaaliya, Daahir Shire Maxamed, ayaa sheegay in Soomaaliya ay leedahay khayraad dabiici ah oo fara badan, kuwaas oo ay kamid yihiin yuraaniyam, liithiyam, naxaas, titaniyam, dahab iyo macdano kale oo qiimo weyn leh, kuwaas oo intooda badan aan weli si buuxda loo sahamin.
Sida lagu sheegay xogta Hay’adda Caalamiga ah ee Tamarta Nukliyeerka iyo Hay’adda OECD ee Tamarta Nukliyeerka, Soomaaliya waxa lagu qiyaasay inay leedahay in ka badan 10,200 oo tan oo yuraaniyam ah, kuwaas oo ku dhowaad 7,600 oo tan loo arko kuwo ganacsi ahaan laga faa’iidaysan karo.
Wasiir Daahir Shire ayaa sheegay in dowladda Soomaaliya ay doonayso in khayraadkaasi loo horumariyo si nabad ah, saaxiibtinimo leh, isla markaana waafaqsan danaha dalka.
Wadahadallo dhexmaray masuuliyiin Soomaali iyo Turki ah oo ka dhacay magaalada Istanbul ayaa diiradda lagu saaray dib u hawlgelinta heshiis iskaashi oo dhinaca macdanta ah oo labada dal kala saxeexdeen sannadkii 2016. Heshiiskaasi waxa uu khuseeyaa sahminta macdanta, khariidaynta juqraafiyeed, tababarrada farsamada iyo iskaashiga maalgashiga.
Turkiga ayaa sannadihii u dambeeyay si weyn u kordhiyay saamayntiisa Soomaaliya, isaga oo maalgashi ku sameeyay dhinacyada ammaanka, ganacsiga, waxbarashada, tamarta iyo kaabeyaasha dhaqaalaha. Iskaashiga cusub ee dhinaca macdanta ayaa qayb ka noqonaya dadaalka Ankara ay ku doonayso inay ku ballaadhiso doorkeeda khayraadka dabiiciga ah ee Afrika.
Warbixinta Business Insider Africa ayaa sidoo kale sheegtay in Turkigu dhawaan heshiis dhinaca macdanta ah la galay dalka Nijeeriya, taas oo muujinaysa xiisaha sii kordhaya ee Ankara ay u qabto macdanta muhiimka ah ee Afrika, xilli uu sii xoogeysanayo tartanka caalamiga ah ee yuraaniyamka iyo macdanta kale ee istaraatiijiga ah.
