Khamis May 27, 2026 {CBB}Baydhabo, Soomaaliya 28, May, 2026: Musharaxa Madaxweynaha urur siyaasadeedka Cadaaladda iyo Wadajirka (JSP) ee Dowlad Goboleedka Koonfur Galbeed, Mudane Sheekh Aadan Maxamed Nuur (Madoobe), ayaa magaalada Baydhabo kulan qado sharaf iyo is-xogwareysi ah ugu sameeyey Xildhibaanada ururka JSP ee dhawaan ku soo baxay doorashadii ka dhacday deegaanada Koonfur Galbeed.
Kulanka ayaa diiradda lagu saaray xoojinta wada shaqeynta, mideynta juhdiga siyaasadeed iyo dardargelinta howlaha la xiriira doorashada Guddoonka Golaha Wakiilada iyo tan Madaxweynaha Dowlad Goboleedka Koonfur Galbeed.
Musharax Sheekh Aadan Madoobe ayaa Xildhibaanada cusub ugu hambalyeeyey guusha ay ka gaareen doorashada, isaga oo Alle uga baryey inuu u fududeeyo mas’uuliyadda loo igmaday.
Sidoo kale, wuxuu ku booriyey inay si daacadnimo iyo hufnaan leh ugu adeegaan shacabka Koonfur Galbeed, kana shaqeeyaan horumar, nabad waarta, midnimo iyo dowladnimo adag oo shacabka rajo cusub u horseeda.
