Talaado 9 June 2026 {CBB}Baydhabo – Labada musharax ee u taagan xilka Hoggaamiyaha Dowlad Goboleedka Koonfur Galbeed, Mudane Shariif Xasan Sheekh Aadan iyo Dr. Cabdicasiis Maxamed Sheekh Cismaan Jawaari, ayaa shaaciyay inay cabasho rasmi ah u gudbiyeen Guddiga Madax-bannaan ee Doorashooyinka Qaranka iyo Soohdimaha, iyagoo ka dalbaday in la mamnuuco in taleefannada gacanta lala galo hoolka ay doorashadu ka dhacayso.
Musharaxiinta ayaa sheegay in cabashadoodu ay ku saleysan tahay walaac ku saabsan in xildhibaannada lagu qasbo inay sawirro ka qaadaan waraaqaha cod-bixinta si loo ogaado cidda ay u codeeyeen, arrintaas oo ay ku tilmaameen mid ka hor imaanaysa mabda’a cod-bixinta qarsoodiga ah iyo xorriyadda xildhibaannada.
Waxay xuseen in guddiga doorashooyinka uu u ballanqaaday inuu arrintan ka soo saari doono habraac iyo go’aan rasmi ah, balse ay sheegeen in ilaa iyo hadda aan la qaadin tallaabo lagu xallinayo cabashadooda.
Labada musharax ayaa sidoo kale ku eedeeyay musharax kale oo doorashada ku jira inuu ku adkeysanayo in taleefannada lala galo goobta doorashada, taas oo ay sheegeen inay dhaawacayso madax-bannaanida cod-bixinta iyo kalsoonida lagu qabo geeddi-socodka doorashada.
Ugu dambeyn, Shariif Xasan Sheekh Aadan iyo Dr. Cabdicasiis Maxamed Sheekh Cismaan Jawaari ayaa ku dhawaaqay inaysan ka qeyb geli doonin doorashada Hoggaamiyaha Koonfur Galbeed ilaa laga saxo arrimaha ay ka cabanayaan, islamarkaana la dejiyo habraac cad oo dammaanad qaadaya qarsoodiga cod-bixinta, hufnaanta doorashada iyo sinnaanta musharaxiinta.
Waxay ugu baaqeen Guddiga Madax-bannaan ee Doorashooyinka Qaranka iyo Soohdimaha inay si degdeg ah uga soo saaraan go’aan rasmi ah arrintan, si loo ilaaliyo kalsoonida shacabka iyo sharciyadda natiijada doorashada.
