Khamiis 1 Octber 2026 {CBB}Baydhabo: Hoggaamiyaha Dowladda Gobaleedka Koonfur Galbeed, Mudane Sheekh Aadan Maxamed Nuur (Madoobe), ayaa Aqalka Madaxtooyada magaalada Baydhabo ku qaabilay wafdi uu hoggaaminayay Guddoomiyihii hore ee Golaha Shacabka Baarlamaanka Federaalka Soomaaliya, Mudane Maxamed Mursal Sheekh Cabdiraxmaan.
Kulanka ayaa looga hadlay xoojinta wada-tashiga iyo iskaashiga siyaasadeed, iyadoo si gaar ah diiradda loo saaray xaaladda guud ee Koonfur Galbeed, arrimaha siyaasadda, amniga, dowlad-dhiska iyo sidii loo sii xoojin lahaa midnimada iyo wadajirka bulshada.
Socdaalka wafdiga uu hoggaaminayay Maxamed Mursal ayaa qeyb ka ah dadaallada lagu ballaarinayo ka qeybgalka siyaasiyiinta iyo qeybaha kala duwan ee bulshada ee Gogosha Dib-u-heshiisiinta ee dhawaan ka furmeysa magaalada Baydhabo.
Intii uu kulanku socday, dhinacyadu waxay is dhaafsadeen aragtiyo iyo talooyin ku saabsan xaaladda dalka iyo tan Koonfur Galbeed, iyagoo adkeeyay muhiimadda ay leedahay in khilaafaadka iyo kala aragti duwanaanshaha lagu wajaho wada-hadal, is-qaddarin iyo xalal siyaasadeed oo la isku raacsan yahay.
Hoggaamiyaha Koonfur Galbeed Sheekh Aadan Madoobe ayaa uga mahadceliyay wafdiga booqashadooda Baydhabo iyo ka qeybgalka dadaallada dib-u-heshiisiinta.
Sheekh Aadan Madoobe ayaa sidoo kale soo dhaweeyay kaalinta madaxda Soomaaliyeed, siyaasiyiinta, waxgaradka, culimada iyo qeybaha kala duwan ee bulshada ay ka qaadanayaan xoojinta wada-tashiga, nabadda, dowlad-dhiska iyo midnimada shacabka Koonfur Galbeed.
Kulanka ayaa kusoo dhammaaday adkeynta muhiimadda ay leedahay wada-shaqeynta iyo is-dhaafsiga aragtiyaha si loo xoojiyo xasilloonida siyaasadeed, nabadda iyo horumarinta dowladnimada.
