Axad 25, May 2025 {CBB}Hantidhawrka Guud ee Jamhuuriyadda Federaalka Soomaaliya, Mudane Axmed Ciise Guutaale, ayaa ka qeybgalay Shir-Madaxeedkii 21aad ee Ururka Hay’adaha Hantidhawrka Sare ee Afrikada Ku Hadasha Ingiriiska (AFROSAI-E), oo ka dhacay magaalada Mahé ee Jasiiradda Seychelles intii u dhaxaysay 19–23 May 2025.
Shirkan oo uu martigeliyay Xafiiska Hantidhawrka Guud ee Seychelles ayaa diiradda lagu saaray dib-u-eegista qorshaha istaraatiijiyadeed ee 2020–2024, daahfurka qorshaha cusub ee 2025–2029 oo xoogga saaraya kor u qaadidda saameynta baarista, madax-bannaanida Xafiisyada Hantidhawrka Guud, iyo iskaashiga gobolka.
Waxaa sidoo kale shirkan lagu taageeray hirgelinta mashruuca Hindisaha Horumarinta Mihnadaha ee Afrika (API), si wax looga qabto baahida xirfadlayaasha ee Xafiisyada Hantidhawrka Guud. Waxaa la xoojiyay iskaashiga u dhexeeya xafiisyada Hantidhawrka iyo hay’adaha la dagaallama musuqmaasuqa, si loo dardargeliyo baaritaanada iyo xog-wadaagga.
Shirka waxa uu xasuus gaar ah u ahaa dabaaldegga 20 sano guurada AFROSAI-E, iyadoo si qoto dheer looga dooday sidii Xafiisyada Hantidhawrka Guud u noqon lahaayeen tiir-dhexaadka hufnaanta, isla xisaabtanka, iyo horumarka waara.
Ka qeybgalka joogtada ah ee Xafiiska Hantidhawrka Guud ee Soomaaliya ee shirarkan ayaa muujinaya doorka sii xoogeysanaya ee uu xafiisku ku leeyahay hormarinta isla xisaabtanka maaliyadeed ee Qaaradda Afrika.
