Xalay abaarihii 8:30 fiidnimo ayaa kooxo hubeysan oo ka tirsan Khawaarijta Al-Shabaab waxay weerar Bombo Qacmeed ku qaadeen guri ku yaalla Degmada Berdaale ee Gobolka Baay. Waxaa la sheegay in bartilmaameedka weerarkaasi uu ahaa Abdikadar Hassan Abdi oo kamid ah macallimiinta Iskuulka Al-Darein Primary and Secondary School ee degmada Berdaale, isla markaana la sheegay inuu la shaqeynayay maamulka degmada.
Wararka laga helayo degmada ayaa sheegaya in Abdikadar Hassan Abdi uu ka badbaaday weerarkaasi, hase yeeshee waxaa la xaqiijiyay in uu ku geeriyooday mid kamid ah eheladiisa oo lagu magacaabi jiray Cabdiqaadir Cabdiraxmaan Ibraahim.
Ma aha markii ugu horreysay oo kooxda Khawaarijta ay weerarro noocan oo kale ah ka geystaan Degmada Berdaale ee Gobolka Baay. Weerarro hore oo sidan la mid ah ayaa lagu dilay dad muhiim u ahaa bulshada degmada, kuwaas oo isugu jiray odayaal dhaqameed, macallimiin, dhakhaatiir iyo mas’uuliyiin dowladeed.
