Talaado November 18, 2025 {CBB}Ra’iisul Wasaaraha Xukuumadda Federaalka Soomaaliya, Xamse Cabdi Barre, ayaa guddoomiyay shir lagu gorfeynayey dhammaystirka hawlaha doorashooyinka Dowladaha Hoose ee dhawaan lagu qaban doono dalka.
Shirka oo ay ka soo qeyb galeen wasiirrada wasaaradaha sida tooska ah ugala shaqeeya hawsha doorashooyinka, Guddoomiyaha Gobolka Banaadir ahna Duqa Muqdisho, iyo Taliyaha Booliiska, ayaa lagu dhageystay warbixin dhammaystiran oo ay soo bandhigeen Guddiga Madaxa-Bannaan ee Doorashooyinka Qaranka iyo Soohdimaha.
Guddoomiyaha guddiga, Cabdikariin Axmed Xasan, ayaa sheegay in diyaar garowgii doorashada uu meel wanaagsan marayo, isla markaana dhammaan adeegyada la diyaariyey si si hufan oo amni leh loo qabto doorashada Dowladaha Hoose.
Ra’iisul Wasaare Xamsa Cabdi Barre ayaa uga mahadceliyay guddiga iyo hay’adaha ku shaqada leh dadaalkooda, isaga oo adkeeyay in Xukuumadda ay ka go’an tahay hirgelinta doorasho Qof iyo Cod ah, iyadoo tallaabada ugu horreysa lagu bilaabayo doorashada Golaha Deegaanka ee Gobolka Banaadir.
