Sabtii 10 August, 2024 {CBB}Ciidamada Xooga dalka Soomaaliyeed gaar ahaan guutada 9-aad ayaa sheegay in ay howlgallo ka dhan AS ay ka sameeyeen deegaanno hoos yimaada magaalada Xudur ee gobolka Bakool.
Saraakiisha ciidamada ayaa sheegay in ay weerar ku qaadeen tuulo qiyaastii 60 KM Waqooyi kaga beegan Magaalada Xuddur ayna ku sugnaayeen xubno ka tirsan AS, iyaga oo ku heystay gawaari rarneyd dad rayid ah.
Taliyaha guutada 9-aad Gaashanle Yuunis aadan Xasan iyo Abaandulaha guutada dhamme Cilmi Aadan Isaaq ayaa sheegay in ay tageen goobaha ay ku sugnaayeen AS.
Saraakiisha ayaa sheegay in ay soo daayeen gawaarida u rarnaa dadka shacabka, isla markaasna ay raad-joogaan xubnihii heystay.
Howlgalkaan ayaa ku soo aadaya xilli ay magaalada Xudur ay weli go’doomin ku hayaan AS, iyaga oo u diida in ay galaan raashinka iyo agabka kale ee nolosha muhiimka u ah.
