Arbaco 22 april 2026 {CBB}Warar isa soo taraya ayaa sheegaya in ciidamo hore uga tirsanaa Daraawiishta Dowlad Goboleedka Koonfur Galbeed ay gaareen degmada Doolow ee gobolka Gedo, kadib safar dhinaca dhulka ah oo ay ku gudbeen.
Ciidamadan ayaa la sheegay inay wateen hub iyo gaadiid, iyadoo arrintan ay dhalisay walaac iyo hadal-heyn siyaasadeed.
Senatar Ilyaas Cali, oo ah Danjiraha Soomaaliya ee Tanzania, ayaa ku eedeeyay in hub lagu soo iibiyay canshuurta shacabka Koonfur Galbeed lala baxsaday, islamarkaana loo wareejiyay Doolow. Wuxuu ugu baaqay maamulka iyo shacabka Gedo inay gacan ka geystaan soo celinta hubkaasi.
Dhanka kale, warar ayaa sheegaya in Guddoomiyaha degmada Baydhabo, Cabdullaahi Watiin, lagu hayo xabsi guri, iyadoo lagu tuhunsan yahay inuu qeyb ka ahaa dhaqdhaqaaqa ciidamadan, inkastoo aan si rasmi ah loo xaqiijin.
Ilaa iyo hadda, Dowladda Federaalka Soomaaliya iyo Maamulka Koonfur Galbeed si rasmi ah ugama hadlin arrintan.
