Isniin 8, June 2026 {CBB}Baydhabo – Guddoomiyaha Golaha Wakiillada Dowladda Koonfur Galbeed Soomaaliya, Dr. Mahad Mohamed Sheekh Xasan, ayaa maanta xafiiskiisa ku qaabilay wafdi uu hoggaaminayay Guddoomiyaha Guddiga Madaxa-bannaan ee Doorashooyinka Qaranka iyo Soohdimaha, Cabdi Kariin Axmed Xasan.
Kulanka ayaa looga hadlay hannaanka iyo heerka uu marayo diyaar-garowga doorashooyinka harsan, iyadoo si gaar ah diiradda loo saaray qorshayaasha lagu xaqiijinayo qabsoomidda doorashooyinka waqtigooda ku dhacaya iyo habsami u socodka geeddi-socodka doorashada.
Guddoomiyaha Golaha Wakiillada ayaa warbixin ka dhageystay guddiga doorashooyinka, isagoo bogaadiyay dadaallada ay ku bixinayaan gudashada waajibaadkooda qaran.
Ugu dambeyn, Guddoomiye Dr. Mahad Mohamed Sheekh Xasan ayaa guddiga ku dhiirrigeliyay inay sii laba jibbaaraan howlaha loo igmaday, islamarkaana ay dhammaystiraan diyaargarowga doorashooyinka si waafaqsan jadwalka, shuruucda iyo xeerarka hagaya geeddi-socodka doorashooyinka dalka.
