Talaado 9 June 2026 {CBB}Baydhabo – Taliyaha Hogaanka Nabadgelyada Wadooyinka Boliiska Soomaaliyeed, Korneel Maxamed Sheekh Cali, iyo wafdi uu hoggaaminayo ayaa maanta gaaray magaalada Baydhabo ee xarunta ku-meel-gaarka ah ee Dowlad Goboleedka Koonfur Galbeed.
Wafdiga ayaa Garoonka Diyaaradaha Shaati Gaduud ee Baydhabo waxaa kusoo dhaweeyay Taliyaha Qeybta Nabadgelyada Wadooyinka Gobolka Baay, Kabtan Cali Aadan, iyadoo ay sidoo kale soo dhoweynta ka qeyb qaateen saraakiisha Ciidanka Nabadgelyada Wadooyinka Gobolka Baay iyo xubno ka tirsan qeybaha kala duwan ee laamaha amniga.
Socdaalka Korneel Maxamed Sheekh Cali ayaa la xiriira arrimo shaqo iyo xoojinta howlaha nabadgelyada wadooyinka, iyadoo la filayo inuu kulamo la yeesho mas’uuliyiinta amniga iyo saraakiisha ka howlgala magaalada Baydhabo.
Soo dhoweynta wafdiga ayaa muujineysa wada-shaqeynta iyo isku xirnaanta ka dhaxeysa laamaha amniga heer federaal iyo kuwa Dowlad Goboleedka Koonfur Galbeed ee dhinaca sugidda amniga iyo badqabka isticmaalayaasha wadooyinka.
