Axad 15 Nov 2026 {CBB}Wasiir Ku-xigeenka Wasaaradda Waxbarashada, Hiddaha iyo Tacliinta Sare ee Dowladda Gobaleedka Koonfur Galbeed Soomaaliya, Mudane Dr. Ibraahim Axmed Nuur, ayaa maanta kormeer shaqo ku tegay afar iskuul oo ku yaalla degmada Afgooye ee Gobolka Shabeellaha Hoose.
Wasiirka ayaa kormeerka waxaa ku wehelinayay Guddoomiyaha Waxbarashada Gobolka Shabeellaha Hoose, Guddoomiyaha Waxbarashada Degmada Afgooye iyo Kormeeraha Waxbarashada Degmada Afgooye.
Kormeerkan ayaa ujeeddadiisu ahayd la socodka xaaladda guud ee dugsiyada, habsami u socodka waxbarashada iyo qiimeynta tayada adeegyada waxbarasho ee ay helaan ardayda.
Wafdiga ayaa intii ay ku jireen kormeerka u kuurgalay xaaladaha iskuullada, iyaga oo la kulmay maamulka iyo macallimiinta, si ay xog uga helaan baahiyaha iyo caqabadaha ka jira goobaha waxbarashada.
Kormeerkan ayaa qayb ka ah dadaallada Wasaaradda Waxbarashada Dowladda Koonfur Galbeed ee lagu xoojinayo dabagalka dugsiyada iyo horumarinta tayada waxbarashada guud ahaan deegaannada maamulka.
